This page in Tamil   Hindi/Sanskrit   Telugu   Malayalam   Bengali   Kannada   English   ITRANS    Marati  Gujarathi   Oriya   Singala   Tibetian   Thai   Japanese   Urdu   Cyrillic/Russian   Hebrew   Korean  
Easy version Classic version

3.063   திருஞானசம்பந்த சுவாமிகள்   திருக்கடைக்காப்பு திருச்செங்காட்டங்குடி - பஞ்சமம் ஹனுமத்தோடி ஆபோகி ஆகிரி ராகத்தில் திருமுறை அருள்தரு திருக்குழல்மாதம்மை உடனுறை அருள்மிகு கணபதீசுவரர் திருவடிகள் போற்றி

https://www.youtube.com/watch?v=ESlxr1wjoeI   Add audio link

பைங்கோட்டு மலர்ப்புன்னைப் பறவைகாள் பயப்பூரச் சங்காட்டந் தவிர்த்தென்னைத் தவிராநோய்  தந்தானே செங்காட்டங் குடிமேய சிறுத்தொண்டன்  பணிசெய்ய வெங்காட்டு ளனலேந்தி விளையாடும் பெருமானே.	1
பொன்னம்பூங் கழிக்கானற் புணர் துணையோ டுடன்வாழும் அன்னங்கா ளன்றில்கா ளகன் றும்போய் வருவீர்காள் கன்னவிறோட் சிறுத்தொண்டன் கணபதீச் சரமேய இன்னமுத னிணையடிக்கீ ழெனதல்ல லுரையீரே.	2
குட்டத்துங் குழிக்கரையுங் குளிர்பொய்கைத் தடத்தகத்தும் இட்டத்தா லிரைதேரு மிருஞ்சிறகின் மடநாராய் சிட்டன்சீர்ச் சிறுத்தொண்டன் செங்காட்டங் குடிமேய வட்டவார் சடையார்க்கென் வருத்தஞ்சென் றுரையாயே.	3
கானருகும் வயலருகுங் கழியருகுங் கடலருகும் மீனிரிய வருபுனலி லிரைதேர்வெண் மடநாராய் தேனமர் தார்ச் சிறுத்தொண்டன் செங்காட்டங் குடிமேய வானமருஞ் சடையார்க்கென் வருத்தஞ்சென் றுரையாயே.	4
ஆரலாஞ் சுறவமேய்ந் தகன்கழனிச் சிறகுலர்த்தும் பாரல்வாய்ச் சிறுகுருகே பயிறூவி மடநாராய் சீருலாஞ் சிறுத்தொண்டன் செங்காட்டங் குடிமேய நீருலாஞ் சடையார்க்கென் நிலைமைசென் றுரையீரே.	5
Go to top
குறைக்கொண்டா ரிடர்தீர்த்தல் கடனன்றே குளிர்பொய்கைத் துறைக்கெண்டை கவர்குருகே துணைபிரியா மடநாராய் கறைக்கண்டன் பிறைச்சென்னிக் கணபதீச்  சரமேய சிறுத்தொண்டன் பெருமான்சீ ரருளொருநாட் பெறலாமே.	6
கருவடிய பசுங்கால்வெண் குருகேயொண் கழிநாராய் ஒருவடியா ளிரந்தாளென் றொருநாட்சென் றுரையீரே செருவடிதோட் சிறுத்தொண்டன் செங்காட்டங் குடிமேய திருவடிதன் திருவருளே பெறலாமோ திறத்தவர்க்கே.	7
கூரார லிரைதேர்ந்து குளமுலவி வயல்வாழும் தாராவே மடநாராய் தமியேற்கொன் றுரையீரே சீராளன் சிறுத்தொண்டன் செங்காட்டங் குடிமேய பேராளன் பெருமான்ற னருளொருநாட் பெறலாமே.	8
நறப்பொலிபூங் கழிக்கான னவில்குருகே யுலகெல்லாம் அறப்பலிதேர்ந் துழல்வார்க்கென் னலர்கோட லழகியதே சிறப்புலவான் சிறுத்தொண்டன் செங்காட்டங் குடிமேய பிறப்பிலிபேர் பிதற்றிநின் றிழக்கோவெம் பெருநலமே.	9
செந்தண்பூம் புனல்பரந்த செங்காட்டங் குடிமேய வெந்தநீ றணிமார்பன் சிறுத்தொண்ட னவன்வேண்ட அந்தண்பூங் கலிக்காழி யடிகளையே யடிபரவும் சந்தங்கொள் சம்பந்தன் றமிழுரைப்போர் தக்கோரே.	11

Thevaaram Link  - Shaivam Link
Other song(s) from this location: திருச்செங்காட்டங்குடி

1.061   திருஞானசம்பந்த சுவாமிகள்   திருக்கடைக்காப்பு   நறை கொண்ட மலர் தூவி, Tune - பழந்தக்கராகம்   (திருச்செங்காட்டங்குடி கணபதீசுவரர் திருக்குழல்மாதம்மை)

3.063   திருஞானசம்பந்த சுவாமிகள்   திருக்கடைக்காப்பு   பைங்கோட்டு மலர்ப் புன்னைப் பறவைகாள்! Tune - பஞ்சமம்   (திருச்செங்காட்டங்குடி கணபதீசுவரர் திருக்குழல்மாதம்மை)

6.084   திருநாவுக்கரசர்   தேவாரம்   பெருந்தகையை, பெறற்கு அரிய மாணிக்கத்தை, Tune - திருத்தாண்டகம்   (திருச்செங்காட்டங்குடி கணபதீசுவரர் திருக்குழல்மாதம்மை)

This page was last modified on Sun, 09 Mar 2025 21:48:18 +0000
          send corrections and suggestions to admin-at-sivaya.org

thirumurai song paadal paadal orig pathigam no 3.063