சிவய.திருக்கூட்டம் sivaya.org Please set your language preference by clicking language links. Search this site internally Or with Google

Home

Home/All Lyrics Bay Area Panchangam Calendar My Account Nayanmar GuruPooja Daily Thirumurai Beneficial Songs Bhajans Thirukkural Mangalam Songs Baby Names Transliteration Terms Can vibhthi act as sanitizer? Shivarathri Significance சைவசித்தாந்த சுருக்கம் North American Temples Contact Us Photos QR Codes

Vinayagar

Vinayagar Agaval Vinayagar Thiruppugazh Vinayagar Anupoothi Vinayagar Kavasam Vinayagar Kariya SIddhi Maalai Vinayagar Songs Thiru Irattai maNi Maalai Ganapatheeswaram Vinaayagar NaanmaniMaalai Vinaayagar Pathigam Ganesha Bhajans

Shivan

Selected Thirumurai All 12 Thirumurai/Search Sivapuranam, Thiru ThondarThogai Thiruvaasagam Complete Pancha Puraanam Nalam Tharum Pathigangal Karu Muthal Thiru Varai Agathiar Thevaara Thirattu Vaazhthu Paadal Thirumurai For Daily Chores Thirumurai Sthalangal Thirumurai Historical Order 1008 Sivan Potri Shivan Bhajans

Murugan

Kandhar Shasti Kavasam Selected Thiruppugazh Search/All Thiruppugazh Thiruppugazh Thalangal Vel Maaral Kandhar Anupoothi Vel virutham Mayil virutham Saeval virutham ThiruVaguppu Kumarstavam Kandha Guru Kavasam Murugan Bhajans

Ambaal

Abirami Anthaathi Abirami Ammai Pathigam Sakala kala valli Maalai Saraswathi Anthhathi Lalitha Navaratna Maalai Vadivudai Maanicka Maalai Abhayaambigai Sadhagam Meenakshi Amman Pillai Tamil Kaamaakshi Dukka Nivaarani Amman Bhajans

Vishnu

Search Prabandham ThiruPallandu Periazhvar Thirumozhi Thiruppavai Naachiar Tirumozhi Perumal Thirumozhi Thiruchchanda Viruththam Thirumaalai Thiruppalliyezhuchchi Amalanadhi piran Kanni Nun Siruththambu Peria Thirumozhi Kurun Thandagam Nedum Thandagam Mudhal Thiruvandhadhi Irandam Thiruvandhadhi Moonram Thiruvandhadhi Naanmugan Thiruvandhadhi Thiruviruththam Thiruvasiriyam Peria Thiruvandhadhi Thiruvezhukkurrirukkai Siriya Thirumadal Peria Thirumadal Thiruvay Mozhi Ramanuja Nootrandhadi Garuda Gamana Tava

QR Code

Generate QR Code for this Page
/thirumurai_song.php?lang=tamil&pathigam_no=12.370

This page in Tamil   Hindi/Sanskrit   Telugu   Malayalam   Bengali   Kannada   English   ITRANS    Marati  Gujarathi   Oriya   Singala   Tibetian   Thai   Japanese   Urdu   Cyrillic/Russian   Hebrew   Korean  
Easy version Classic version

12.370   சேக்கிழார்   வார்கொண்ட வனமுலையாள் சருக்கம்

+ Show Meaning   Add audio link

மாவீற் றிருந்த பெருஞ்சிறப்பின் மன்னுந் தொன்மை மலைநாட்டுப் பாவீற் றிருந்த பல்புகழில் பயிலு மியல்பிற் பழம்பதிதான் சேவீற் றிருந்தார் திருவஞ்சைக் களமும் நிலவிச் சேரர்குலக் கோவீற் றிருந்து முறைபுரியுங் குலக்கோ மூதூர் கொடுங்கோளூர்.	1
காலை யெழும்பல் கலையின்ஒலி களிற்றுக் கன்று வடிக்கும்ஒலி சோலை யெழுமென் சுரும்பின்ஒலி துரகச் செருக்காற் சுலவும்ஒலி பாலை விபஞ்சி பயிலும்ஒலி பாட லாடல் முழவின்ஒலி வேலை ஒலியை விழுங்கியெழ விளங்கி யோங்கும் வியப்பினதால்.	2
மிக்க செல்வ மனைகள்தொறும் விழையும் இன்பம் விளங்குவன பக்கம் நெருங்கு சாலைதொறும் பயில்சட் டறங்கள் பல்குவன தக்க அணிகொள் மடங்கள்தொறும் சைவ மேன்மை சாற்றுவன தொக்க வளங்கொள் இடங்கள்தொறும் அடங்க நிதியந் துவன்றுவன.	3
வேத நெறியின் முறைபிறழா மிக்க ஒழுக்கந் தலைநின்ற சாதி நான்கும் நிலைதழைக்கும் தன்மைத் தாகித் தடமதில்சூழ் சூத வகுள சரளநிரை துதையுஞ் சோலை வளநகர்தான் கோதை யரசர் மகோதையெனக் குலவு பெயரும் உடைத்துலகில்.	4
முருகு விரியும் மலர்ச்சோலை மூதூ ரதன்கண் முறைமரபின் அருகி யழியுங் கலிநீக்கி அறங்கொள் சைவத் திறந்தழைப்பத் திருகு சினவெங் களியானைச் சேரர் குலமும் உலகுஞ்செய் பெருகு தவத்தால் அரனருளால் பிறந்தார் பெருமாக் கோதையார்.	5
Go to top
திருமா நகரந் திருவவதா ரஞ்செய் விழவின் சிறப்பினால் வருமா களிகூர் நெய்யாடல் எடுப்ப வான மலர்மாரி தருமா விசும்பின் மிகநெருங்கத் தழங்கும் மொலிமங் கலந்தழைப்பப் பெருமா நிலத்தில் எவ்வுயிரும் பெருகு மகிழ்ச்சி பிறங்கினவால்.	6
மண்மேற் சைவ நெறிவாழ வளர்ந்து முன்னை வழியன்பால் கண்மேல் விளங்கு நெற்றியினார் கழலே பேணுங் கருத்தினராய் உண்மே வியஅன் பினராகி யுரிமை யரசர் தொழில்புரியார் தெண்ணீர் முடியார் திருவஞ்சைக் களத்தில் திருத்தொண் டேபுரிவார்.	7
உலகின் இயல்பும் அரசியல்பும் உறுதி யல்ல எனவுணர்வார் புலரி யெழுந்து புனல்மூழ்கிப் புனித வெண்ணீற் றினும்மூழ்கி நிலவு திருநந் தனவனத்து நீடும் பணிகள் பலசெய்து மலரு முகையுங் கொணர்ந்துதிரு மாலை சாத்த மகிழ்ந்தமைத்து.	8
திருமஞ் சனமும் கொணர்ந்துதிரு வலகும் இட்டுத் திருமெழுக்கு வருமன் புடன்இன் புறச்சாத்தி மற்று முள்ள திருப்பணிகள் பெருமை பிறங்கச் செய்தமைத்துப் பேணும் விருப்பில் திருப்பாட்டும் ஒருமை நெறியி னுணர்வுவர ஓதிப் பணிந்தே யொழுகுநாள்.	9
நீரில் மலிந்த கடல்அகழி நெடுமால் வரையின் கொடிமதில்சூழ் சீரின் மலிந்த திருநகரம் அதனிற் செங்கோற் பொறையனெனும் காரின் மலிந்த கொடைநிழன்மேற் கவிக்குங் கொற்றக் குடைநிழற்கீழ்த் தாரின் மலிந்த புயத்தரசன் தரணி நீத்துத் தவஞ்சார்ந்தான்.	10
Go to top
வந்த மரபின் அரசளிப்பான் வனஞ்சார் தவத்தின் மருவியபின் சிந்தை மதிநூல் தேரமைச்சர் சிலநாள் ஆய்ந்து தெளிந்தநெறி முந்தை மரபின் முதல்வர்திருத் தொண்டு முயல்வார் முதற்றாக இந்து முடியார் திருவஞ்சைக் களத்தில் அவர்பால் எய்தினார்.	11
எய்தி யவர்தம் எதிரிறைஞ்சி இருந்தண் சாரல் மலைநாட்டுச் செய்தி முறைமை யால்உரிமைச் செங்கோல் அரசு புரிவதற்கு மைதீர் நெறியின் முடிசூடி யருளு மரபால் வந்ததெனப் பொய்தீர் வாய்மை மந்திரிகள் போற்றிப் புகன்ற பொழுதின்கண்.	12
இன்பம் பெருகுந் திருத்தொண்டுக் கிடையூ றாக இவர்மொழிந்தார் அன்பு நிலைமை வழுவாமை அரசு புரக்கும் அருளுண்டேல் என்பும் அரவும் புனைந்தாரை இடைபெற் றறிவே னெனப்புக்கு முன்பு தொழுது விண்ணப்பம் செய்தார் முதல்வர் அருளினால்.	13
மேவும் உரிமை அரசளித்தே விரும்பு காதல் வழிபாடும் யாவும் யாருங் கழறினவும் அறியும் உணர்வும் ஈறில்லாத் தாவில் விறலுந் தண்டாத கொடையும் படைவா கனம்முதலாம் காவல் மன்னர்க் குரியனவும் எல்லாங் கைவந் துறப்பெற்றார்.	14
ஆன அருள்கொண் டஞ்சலிசெய் திறைஞ்சிப் புறம்போந் தரசளித்தல் ஊன மாகுந் திருத்தொண்டுக் கெனினும் உடையா னருளாலே மேன்மை மகுடந் தாங்குதற்கு வேண்டும் அமைச்சர்க் குடன்படலும் மான அமைச்சர் தாம்பணிந்துஅவ் வினைமேற் கொண்டு மகிழ்ந்தெழுந்தார்.	15
Go to top
உரிமை நாளில் ஓரைநலன் எய்த மிக்க வுபகரணம் பெருமை சிறக்க வேண்டுவன வெல்லாம் பிறங்க மங்கலஞ்செய் திருமை யுலகுக் கொருமைமுடி கவித்தார் எல்லா வுயிருமகிழ் தரும நிலைமை யறிந்துபுவி தாங்குங் கழறிற் றறிவார்தாம்.	16
தம்பி ரானார் கோயில்வலங் கொண்டு திருமுன் தாழ்ந்தெழுந்து கும்ப யானை மேல்கொண்டு கொற்றக் குடையும் சாமரையும் நம்பும் உரிமை யவர்தாங்க நலங்கொள் நகர்சூழ் வலங்கொள்வார் மொய்ம்பில் உவரின் பொதிசுமந்தோர் வண்ணான் முன்னே வரக்கண்டார்.	17
மழையிற் கரைந்தங் குவரூறி மேனி வெளுத்த வடிவினால் உழையிற் பொலிந்த திருக்கரத்தார் அடியார் வேடம் என்றுணர்ந்தே இழையிற் சிறந்த வோடைநுதல் யானைக் கழுத்தி னின்றிழிந்து விழைவிற் பெருகுங்காதலினால் விரைந்து சென்று கைதொழுதார்.	18
சேரர் பெருமான் தொழக்கண்டு சிந்தை கலங்கி முன்வணங்கி யார்என் றடியே னைக்கொண்ட தடியேன் அடிவண் ணானென்னச் சேரர் பிரானு மடிச்சேரன் அடியேன் என்று திருநீற்றின் வார வேடம் நினைப்பித்தீர் வருந்தா தேகும் எனமொழிந்தார்.	19
மன்னர் பெருமான் திருத்தொண்டு கண்டு மதிநீடு அமைச்சரெலாம் சென்னி மிசைஅஞ் சலிசெய்து போற்றச் சினமால் களிறேறி மின்னு மணிப்பூண் கொடிமாட வீதி மூதூர் வலங்கொண்டு பொன்னின் மணிமா ளிகைவாயில் புக்கார் புனைமங் கலம்பொலிய.	20
Go to top
யானை மிசைநின் றிழிந்தருளி இலங்கும் மணிமண் டபத்தின்கண் மேன்மை அரியா சனத்தேறி விளங்குங் கொற்றக் குடைநிழற்றப் பானல் விழியார் சாமரைமுன் பணிமா றப்பன் மலர்தூவி மான அரசர் போற்றிடவீற் றிருந்தார் மன்னர் பெருமானார்.	21
உலகு புரக்கும் குடைவளவர் உரிமைச் செழிய ருடன்கூட நிலவு பெருமுக் கோக்களாய் நீதி மனுநூல் நெறிநடத்தி அலகில் அரசர் திறைகொணர அகத்தும் புறத்தும் பகையறுத்து மலருந் திருநீற் றொளிவளர மறைகள் வளர மண்ணளிப்பார்.	22
நீடும் உரிமைப் பேரரசால் நிகழும் பயனும் நிறைதவமும் தேடும் பொருளும் பெருந்துணையும் தில்லைத் திருச்சிற் றம்பலத்துள் ஆடுங் கழலே எனத்தெளிந்த அறிவால் எடுத்த திருப்பாதம் கூடும் அன்பில் அர்ச்சனைமேல் கொண்டார் சேரர் குலப்பெருமாள்.	23
வாசத் திருமஞ் சனம்பள்ளித் தாமஞ் சாந்த மணித்தூபம் தேசிற் பெருகுஞ் செழுந்தீபம் முதலா யினவும் திருவமுதும் ஈசற் கேற்ற பரிசினால் அருச்சித் தருள எந்நாளும் பூசைக் கமர்ந்த பெருங்கூத்தர் பொற்பார் சிலம்பின் ஒலியளித்தார்.	24
நம்பர் தாளின் வழிபாட்டால் நாளும் இன்புற்று அமர்கின்றார் இம்பர் உலகில் இரவலர்க்கும் வறியோ ரெவர்க்கும் ஈகையினால் செம்பொன் மழையாம் எனப்பொழிந்து திருந்து வென்றி யுடன்பொருந்தி உம்பர் போற்றத் தம்பெருமாற் குரிய வேள்வி பலசெய்தார்.	25
Go to top
இன்ன வண்ணம் இவரொழுக எழில்கொள் பாண்டி நன்னாட்டு மன்னும் மதுரைத் திருவால வாயில் இறைவர் வருமன்பால் பன்னும் இசைப்பா டலிற்பரவும் பாண னார்பத் திரனார்க்கு நன்மை நீடு பெருஞ்செல்வம் நல்க வேண்டி அருள்புரிவார்.	26
இரவு கனவில் எழுந்தருளி என்பால் அன்பால் எப்பொழுதும் பரவு சேரன் தனக்குனக்குப் பைம்பொன் காணம் பட்டாடை விரவு கதிர்செய் நவமணிப்பூண் வேண்டிற்று எல்லாங் குறைவின்றித் தரநம் மோலை தருகின்றோம் தாழா தேகி வருகென்று.	27
அதிர்கழல் உதியர் வேந்தற் கருள்செய்த பெருமை யாலே எதிரில்செல் வத்துக்கு ஏற்ற இருநிதி கொடுக்க வென்று மதிமலி புரிசை என்னும் வாசகம் வரைந்த வாய்மைக் கதிரொளி விரிந்த தோட்டுத் திருமுகங் கொடுத்தார் காண.	28
சங்கப் புலவர் திருமுகத்தைத் தலைமேற் கொண்டு பத்திரனார் அங்கப் பொழுதே புறப்பட்டு மலைநா டணைய வந்தெய்தித் துங்கப் புரிசைக் கொடுங்கோளூர் தன்னிற் புகுந்து துன்னுகொடி மங்குல் தொடக்கும் மாளிகைமுன் வந்து மன்னர்க் கறிவித்தார்.	29
கேட்ட பொழுதே கைதலைமேல் கொண்டு கிளர்ந்த பேரன்பால் நாட்டம் பொழிநீர் வழிந்திழிய எழுந்து நடுக்கம் மிகவெய்தி ஓட்டத் தம்பொன் மாளிகையின் புறத்தி லுருகுஞ் சிந்தையுடன் பாட்டின் தலைமைப் பாணனார் பாதம் பலகாற் பணிகின்றார்.	30
Go to top
அடியேன் பொருளாத் திருமுகங்கொண் டணைந்த தென்ன அவர் தாமும் கொடிசேர் விடையார் திருமுகங்கைக் கொடுத்து வணங்கக் கொற்றவனார் முடிமேற் கொண்டு கூத்தாடி மொழியுங் குழறிப் பொழிகண்ணீர் பொடியார் மார்பிற் பரந்துவிழப் புவிமேற் பலகால் வீழ்ந்தெழுந்தார்.	31
பரிவில் போற்றித் திருமுகத்தைப் பலகால் தொழுது படியெடுக்க உரிய வகையா லெடுத்தோதி யும்பர் பெருமா னருள்போற்றி விரிபொற் சுடர்மா ளிகைபுக்கு மேவும் உரிமைச் சுற்றமெலாம் பெரிது விரைவிற் கொடுபோந்து பேணும் அமைச்சர்க் கருள்செய்வார்.	32
நங்கள் குலமா ளிகையதனுள் நலத்தின் மிக்க நிதிக்குவையாய்ப் பொங்கி நிறைந்த பலவேறு வகையிற் பொலிந்த பண்டாரம் அங்க ணொன்று மொழியாமே அடையக் கொண்டு புறப்பட்டுத் தங்கும் பொதிசெய் தாளின்மேற் சமைய வேற்றிக் கொணருமென.	33
சேரர் பெருமான் அருள்செய்யத் திருந்து மதிநூல் மந்திரிகள் சாரு மணிமா ளிகையுள்ளால் தனங்கள் எல்லாம் நிறைந்தபெரும் சீர்கொள் நிதிய மெண்ணிறந்த வெல்லாம் பொதிசெய் தாளின்மேல் பாரில் நெருங்க மிசையேற்றிக் கொண்டு வந்து பணிந்தார்கள்.	34
பரந்த நிதியின் பரப்பெல்லாம் பாண னார்பத் திரனார்க்கு நிரந்த தனங்கள் வெவ்வேறு நிரைத்துக் காட்டி மற்றிவையும் உரந்தங் கியவெங் கரிபரிகள் முதலாம் உயிருள் ளனதனமும் புரந்த அரசுங் கொள்ளுமென மொழிந்தார் பொறையர் புரவலனார்.	35
Go to top
பாண னார்பத் திரனாரும் பைம்பொன் மௌலிச் சேரலனார் காணக் கொடுத்த நிதியெல்லாம் கண்டு மகிழ்வுற் றதிசயித்துப் பேண எனக்கு வேண்டுவன அடியேன் கொள்ளப் பிஞ்ஞகனார் ஆணை யரசும் அரசுறுப்பும் கைக்கொண் டருளும் எனஇறைஞ்ச.	36
இறைவ ராணை மறுப்பதனுக்கு அஞ்சி யிசைந்தார் இகல்வேந்தர் நிறையு நிதியின் பரப்பையெல்லாம் நிலத்தை நெளிய வுடன்கொண்டே உறைமும் மதத்துக் களிறுபரி யுள்ளிட் டனவேண் டுவகொண்டோர் பிறைவெண் கோட்டு களிற்றுமேல் கொண்டு போந்தார் பெரும்பாணர்.	37
பண்பு பெருகும் பெருமாளும் பாண னார்பத் திரனார்பின் கண்கள் பொழிந்த காதல்நீர் வழியக் கையால் தொழுதணைய நண்பு சிறக்கு மவர் தம்மை நகரின் புறத்து விடைகொண்டு திண்பொற் புரிசைத் திருமதுரை புக்கார் திருந்தும் இசைப்பாணர்.	38
வான வரம்பர் குலம்பெருக்கும் மன்ன னாரும் அறித்தேகிக் கூனல் இளவெண் பிறைக்கண்ணி முடியா ரடிமை கொண்டருளும் பான்மை யருளின் பெருமையினை நினைந்து பலகாற் பணிந்தேத்தி மேன்மை விளங்கு மாளிகைமண் டபத்துள் அரசு வீற்றிருந்தார்.	39
அளவில் பெருமை அகிலயோ னிகளும் கழறிற் றறிந்தவற்றின் உளமன் னியமெய் யுறுதுயர்கள் ஒன்று மொழியா வகையகற்றிக் களவு கொலைகள் முதலான கடிந்து கழறிற் றறிவார்தாம் வளவர் பெருமா னுடன்செழியர் மகிழும் கலப்பில் வைகு நாள்.	40
Go to top
வானக் கங்கை நதிபொதிந்த மல்கு சடையார் வழிபாட்டுத் தூநற் சிறப்பின் அர்ச்சனையாம் தொண்டு புரிவார் தமக்கொருநாள் தேனக் கலர்ந்த கொன்றையினார் ஆடற் சிலம்பின் ஒலி முன்போல் மானப் பூசை முடிவின்கண் கேளா தொழிய மதிமயங்கி.	41
பூசை கடிது முடித்தடியேன் என்னோ பிழைத்த தெனப் பொருமி ஆசை உடம்பால் மற்றினிவே றடையும் இன்பம் யாதென்று தேசின் விளங்கும் உடைவாளை யுருவித் திருமார் பினில்நாட்ட ஈசர் விரைந்து திருச்சிலம்பின் ஒசை மிகவும் இசைப்பித்தார்.	42
ஆடல் சிலம்பின் ஒலிகேளா வுடைவா ளகற்றி யங்கைமலர் கூடத் தலைமேற் குவித்தருளிக் கொண்டு விழுந்து தொழுதெழுந்து நீடப் பரவி மொழிகின்றார் நெடுமால் பிரமன் அருமறைமுன் தேடற் கரியாய் திருவருள்முன் செய்யா தொழிந்த தென்னென்றார்.	43
என்ற பொழுதில் இறைவர்தாம் எதிர்நின் றருளா தெழுமொலியால் மன்றி னிடைநங் கூத்தாடல் வந்து வணங்கி வன்றொண்டன் ஒன்று முணர்வால் நமைப்போற்றி யுரைசேர் பதிகம் பாடுதலால் நின்று கேட்டு வரத்தாழ்த்தோம் என்றார் அவரை நினைப்பிப்பார்.	44
என்னே அடியார்க் கிவரருளும் கருணை யிருந்த வாறென்று பொன்னேர் சடையார் திருநடஞ்செய் புலியூர்ப் பொன்னம் பலம்இறைஞ்சித் தன்னே ரில்லா வன்றொண்டர் தமையுங் காண்பன் எனவிரும்பி நன்னீர் நாட்டுச் செலநயந்தார் நாமச் சேரர் கோமானார்.	45
Go to top
பொன்னார் மௌலிச் சேரலனார் போற்றும் அமைச்சர்க் கஃதியம்பி நன்னாள் கொண்டு பெரும்பயணம் எழுக வென்று நலஞ்சாற்ற மின்னா ரயில்வேற் குலமறவர் வென்றி நிலவுஞ் சிலைவீரர் அந்நாட் டுள்ளார் அடையநிரந் தணைந்தார் வஞ்சிஅக நகர்வாய்.	46
இட்ட நன்னாள் ஓரையினில் இறைவர் திருவஞ் சைக்களத்து மட்டு விரிபூங் கொன்றையினார் தம்மை வலங்கொண் டிறைஞ்சிப்போய்ப் பட்ட நுதல்வெங் களியானைப் பிடர்மேற் கொண்டு பனிமதியந் தொட்ட கொடிமா ளிகைமூதூர் கடந்தார் உதியர் தோன்றலார்.	47
யானை யணிகள் பரந்துவழி யெங்கும் நிரந்து செல்லுவன மான மலைநாட் டினின்மலிந்த மலைக ளுடன்போ துவபோன்ற சேனை வீரர் புடைபரந்து செல்வ தங்கண் மலைசூழ்ந்த கான மடைய வுடன்படர்வ போலுங் காட்சி மேவின தால்.	48
புரவித் திரள்கள் ஆயோகப் பொலிவி னசைவிற் போதுவன அரவச் சேனைக் கடற்றரங்க மடுத்து மேன்மே லடர்வனபோல் விரவிப் பரந்து சென்றனவான் மிசையு மவலு மொன்றாக நிரவிப் பரந்த நெடுஞ்சேனை நேமி நெளியச் சென்றனவால்.	49
அந்நாட் டெல்லை கடந்தணைய அமைச்சர்க் கெல்லாம் விடையருளி மின்னார் மணிப்பூண் மன்னவனார் வேண்டு வாரை யுடன்கொண்டு கொன்னார் அயில்வேல் மறவர்பயில் கொங்கு நாடு கடந்தருளிப் பொன்னாட் டவரும் அணைந்தாடும் பொன்னி நீர்நாட் டிடைப்போவார்.	50
Go to top
சென்ற திசையில் சிவனடியார் சிறப்பி னோடும் எதிர்கொள்ளக் குன்றும் கானும் உடைக்குறும்பர் இடங்கள் தோறுங் குறைவறுப்பத் துன்று முரம்புங் கான்யாறுந் துறுகற் சுரமும் பலகடந்து வென்றி விடையார் இடம்பலவும் மேவிப் பணிந்து செல்கின்றார்.	51
பொருவில் பொன்னித் திருநதியின் கரைவந் தெய்திப் புனிதநீர் மருவும் தீர்த்தம் மகிழ்ந்தாடி மருங்கு வடபாற் கரையேறித் திருவிற் பொலியுந் திருப்புலியூர்ச் செம்பொன் மன்றுள் நடம்போற்ற உருகி மனத்தி னுடன்சென்றார் ஒழியா அன்பின் வழிவந்தார்.	52
வந்து தில்லை மூதூரின் எல்லை வணங்கி மகிழ்ச்சியினால் அந்த ணாளர் தொண்டர்குழாம் அணைந்த போதில் எதிர்வணங்கிச் சந்த விரைப்பூந் திருவீதி இறைஞ்சித் தலைமேற் கரமுகிழ்ப்பச் சிந்தை மகிழ எழுநிலைக்கோ புரத்தை யணைந்தார் சேரலனார்.	53
நிலவும் பெருமை எழுநிலைக்கோ புரத்தின் முன்னர் நிலத்திறைஞ்சி மலருங் கண்ணீர்த் துளிததும்பப் புகுந்து மணிமா ளிகைவலங்கொண்டு உலகு விளக்குந் திருப்பேரம் பலத்தை வணங்கி யுள்ளணைந்தார் அலகில் அண்டம் அளித்தவர்நின்று ஆடுந் திருச்சிற் றம்பலமுன்.	54
அளவில் இன்பப் பெருங்கூத்தர் ஆட எடுத்த கழல்காட்ட உளமும் புலமும் ஒருவழிச்சென்று உருகப் போற்றி யுய்கின்றார் களனில் விடம்வைத் தளித்தவமு தன்றி மன்றிற் கழல்வைத் வளருந் திருக்கூத் தமுதுலகுக்கு அளித்த கருணை வழுத்தினார்.	55
Go to top
ஆரா ஆசை ஆனந்தக் கடலுள் திளைத்தே யமர்ந்தருளால் சீரார் வண்ணப் பொன்வண்ணத் திருவந் தாதி திருப்படிக்கீழ்ப் பார்ஆ தரிக்க எடுத்தேத்திப் பணிந்தார் பருவ மழைபொழியும் காரால் நிகர்க்க அரிய கொடைக் கையார் கழறிற் றறிவார் தாம்.	56
தம்பி ரானார்க் கெதிர்நின்று தமிழ்ச்சொல் மாலை கேட்பிக்க உம்பர் வாழ நடமாடும் ஒருவ ரதற்குப் பரிசிலெனச் செம்பொன் மணிமன் றினில்எடுத்த செய்ய பாதத் திருச்சிலம்பின் இம்பர் நீட எழுந்தவொலி தாமும் எதிரே கேட்பித்தார்.	57
ஆடற் சிலம்பின் ஒலிகேட்பார் அளவில் இன்ப ஆனந்தம் கூடப் பெற்ற பெரும்பேற்றின் கொள்கை வாய்ப்பக் கும்பிடுவார் நீடப் பணியுங் காலமெலாம் நின்று தொழுது புறம்போந்து மாடத் திருமா ளிகைவீதி வணங்கிப் புறத்து வைகினார்.	58
பரவுந் தில்லை வட்டத்துப் பயில்வார் பைம்பொன் அம்பலத்துள் அரவும் புனலுஞ் சடையாட ஆடு வார்கூத் தாராமை விரவுங் காதல் மிக்கோங்க வேதம் படியும் திருப்படிக்கீழ் இரவும் பகலும் பணிந்தேத்தி இன்பம் சிறக்கும் அந்நாளில்.	59
ஆடும் பெருமான் பாடல்கேட் டருளித் தாழ்த்த படிதமக்குக் கூடும் பரிசால் முன்பருளிச் செய்த நாவ லூர்க்கோவை நீடும் பெருங்கா தலிற்காண நிறைந்த நினைவு நிரம்பமால் தேடும் பாதர் அருளினால் திருவா ரூர்மேற் செலவெழுந்தார்.	60
Go to top
அறிவின் எல்லை யாயதிருத் தில்லை யெல்லை யமர்ந்திறைஞ்சிப் பிறிவி லாத திருவடியைப் பெருகும் உள்ளத் தினிற்பெற்றுச் செறியு ஞான போனகர்வந்து அருளும் புகலி சென்றிறைஞ்சி மறிசேர் கரத்தார் கோயில்பல வணங்கி மகிழ்ந்து வழிக்கொள்வார்.	61
வழியில் குழியில் செழுவயலில் மதகில் மலர்வா விகளில்மடுச் சுழியில் தரளந் திரைசொரியுந் துறைநீர்ப் பொன்னி கடந்தேறி விழியில் திகழுந் திருநுதலார் விரும்பும் இடங்கள் இறைஞ்சியுகக் கழிவில் பெருவெள் ளமுங்கொள்ளாக் கழனி யாரூர் கண்ணுற்றார்.	62
நம்பி தாமும் அந்நாள்போய் நாகைக் காரோ ணம்பாடி அம்பொன் மணிப்பூண் நவமணிகள் ஆடை சாந்தம் அடற்பரிமா பைம்பொற் சுரிகை முதலான பெற்று மற்றும் பலபதியில் தம்பி ரானைப் பணிந்தேத்தித் திருவா ரூரில் சார்ந்திருந்தார்.	63
வந்து சேரர் பெருமானார் மன்னும் திருவா ரூர்எய்த அந்த ணாளர் பெருமானும் அரசர் பெருமான் வரப்பெற்றுச் சிந்தை மகிழ எதிர்கொண்டு சென்று கிடைத்தார் சேரலனார் சந்த விரைத்தார் வன்றொண்டர் முன்பு விருப்பி னுடன்தாழ்ந்தார்.	64
முன்பு பணிந்த பெருமாளைத் தாமும் பணிந்து முகந்தெடுத்தே அன்பு பெருகத் தழுவவிரைந் தவரும் ஆர்வத் தொடுதழுவ இன்ப வெள்ளத் திடைநீந்தி ஏற மாட்டா தலைவார்போல் என்பும் உருக வுயிரொன்றி யுடம்பும் ஒன்றாம் எனஇசைந்தார்.	65
Go to top
ஆன நிலைமை கண்டதிருத் தொண்டர் அளவில் மகிழ்வெய்த மானச் சேரர் பெருமானார் தாமும் வன்றொண் டருங்கலந்த பான்மை நண்பால் சேரமான் தோழர் என்று பார்பரவும் மேன்மை நாமம் முனைப்பாடி வேந்தர்க் காகி விளங்கியதால்.	66
ஒருவர் ஒருவ ரிற்கலந்த வுணர்வால் இன்ப மொழியுரைத்து மருவ இனியார் பாற்செய்வ தென்னா மென்னு மகிழ்ச்சியினால் பருவ மழைச்செங் கைபற்றிக் கொண்டு பரமர் தாள்பணியத் தெருவு நீங்கிக் கோயிலினுள் புகுந்தார் சேர மான்தோழர்.	67
சென்று தேவா சிரியனைமுன் இறைஞ்சித் திருமா ளிகைவலங்கொண்டு ஒன்றும் உள்ளத் தொடும்புகுவார் உடைய நம்பி முன்னாக நின்று தொழுது கண்ணருவி வீழ நிலத்தின் மிசைவீழ்ந்தே என்றும் இனிய தம்பெருமான் பாதம் இறைஞ்சி ஏத்தினார்.	68
தேவர் முனிவர் வந்திறைஞ்சுந் தெய்வப் பெருமாள் கழல்வணங்கி மூவர் தமக்கு முதலாகும் அவரைத் திருமும் மணிக்கோவை நாவ லூரர் தம்முன்பு நன்மை விளங்கக் கேட்பித்தார் தாவில் பெருமைச் சேரலனார் தம்பி ரானார் தாம்கொண்டார்.	69
அங்கண் அருள்பெற் றெழுவாரைக் கொண்டு புறம்போந் தாரூரர் நங்கை பரவை யார்திருமா ளிகையில் நண்ண நன்னுதலார் பொங்கு விளக்கும் நிறைகுடமும் பூமா லைகளும் புகையகிலும் எங்கும் மடவார் எடுத்தேத்த அணைந்து தாமும் எதிர்கொண்டார்.	70
Go to top
சோதி மணிமா ளிகையின்கண் சுடரும் பசும்பொற் கால்அமளி மீது பெருமாள் தமையிருத்தி நம்பி மேவி யுடனிருப்பக் கோதில் குணத்துப் பரவையார் கொழுந னார்க்குந் தோழர்க்கும் நீதி வழுவா ஒழுக்கத்து நிறைபூ சனைகள் முறையளித்தார்.	71
தாண்டு புரவிச் சேரர்குலப் பெருமாள் தமக்குத் திருவமுது தூண்டு சோதி விளக்கனையார் அமைக்கத் துணைவர் சொல்லுதலும் வேண்டும் பரிசு வெவ்வேறு விதத்துக் கறியும் போனகமும் ஈண்டச் சமைப்பித் துடன்வந்தார்க் கெல்லாம் இயல்பின் விருந்தமைத்தார்.	72
அரசர்க் கமைத்த சிறப்பினும்மேல் அடியார்க் கேற்கும் படியாக விரவிப் பெருகும் அன்பினுடன் விரும்பும் அமுது சமைத்ததற்பின் புரசைக் களிற்றுச் சேரலனார் புடைசூழ்ந் தவரோ டமுதுசெயப் பரவைப் பிறந்த திருவனைய பரவை யார்வந் தறிவித்தார்.	73
சேரர் பெருமான் எழுந்தருளி அமுது செய்யச் செய்தவத்தால் தாரின் மலிபூங் குழல்மடவாய் தாழா தமுது செய்வியெனப் பாரின் மலிசீர் வன்றொண்டர் அருளிச் செய்யப் பரிகலங்கள் ஏரின் விளங்கத் திருக்கரத்தில் இரண்டு படியா ஏற்றுதலும்.	74
ஆண்ட நம்பி பெருமாளை யுடனே யமுது செய்தருள வேண்டு மென்ன ஆங்கவரும் விரைந்து வணங்கி வெருவுறலும் நீண்ட தடக்கை பிடித்தருளி மீண்டும் நேரே குறைகொள்ள ஈண்ட அமுது செய்வதனுக் கிசைந்தார் பொறையர்க் கிறையவனார்.	75
Go to top
ஒக்க அமுது செய்தருள வுயர்ந்த தவத்துப் பரவையார் மிக்க விருப்பால் அமுது செய்வித் தருளி மேவும் பரிசனங்கள் தக்க வகையால் அறுசுவையுந் தாம்வேண் டியவா றினிதருந்தத் தொக்க மகிழ்ச்சி களிசிறப்பத் தூயவிருந்தின் கடன்முடித்தார்.	76
பனிநீர் விரவு சந்தனத்தின் பசுங்கர்ப் பூர விரைக்கலவை வனிதை யவர்கள் சமைத்தெடுப்பக் கொடுத்து மகிழ்மான் மதச்சாந்தும் புனித நறும்பூ மாலைகளும் போற்றிக் கொடுத்துப் பொற்கொடியார் இனிய பஞ்ச வாசமுடன் அடைக்காய் அமுது மேந்தினார்.	77
ஆய சிறப்பிற் பூசனைகள் அளித்த வெல்லாம் அமர்ந்தருளித் தூய நீறு தங்கள்திரு முடியில் வாங்கித் தொழுதணிந்து மேய விருப்பி னுடனிருப்பக் கழறிற் றறிவார் மெய்த்தொண்டின் சேய நீர்மை யடைந்தாராய் நம்பி செம்பொற் கழல்பணிந்தார்.	78
மலைநாட் டரசர் பெருமானார் வணங்க வணங்கி எதிர்தழுவிக் கலைநாட் பெருகு மதிமுகத்துப் பரவை யார்தங் கணவனார் சிலைநாட் டியவெல் கொடியாரைச் சேரத் தந்தார் எனக்கங்கை அலைநாட் கொன்றை முடிச்சடையார் அருளே போற்றி யுடனமர்ந்தார்.	79
செல்வத் திருவா ரூர்மேவும் செம்பொற் புற்றில் இனிதமர்ந்த வில்வெற் புடையார் கழல்வணங்கி வீதி விடங்கப் பெருமானை மல்லற் பவனி சேவித்து வாழ்ந்து நாளும் மனமகிழ்ந்து சொல்வித் தகர்தாம் இருவர்களுந் தொடர்ந்த காத லுடன்சிறந்தார்.	80
Go to top
இவ்வா றொழுகும் நாளின்கண் இலங்கு மணிப்பூண் வன்றொண்டர் மைவாழ் களத்து மறையவனார் மருவும் இடங்கள் பலவணங்கிச் செய்வார் கன்னித் தமிழ்நாட்டுத் திருமா மதுரை முதலான மொய்வார் சடையார் மூதூர்கள் இறைஞ்ச முறைமை யால்நினைந்தார்.	81
சேரர் பிரானும் ஆரூரர் தம்மைப் பிரியாச் சிறப்பாலும் வாரம் பெருகத் தமக்கன்று மதுரை யால வாயமர்ந்த வீரர் அளித்த திருமுகத்தால் விரும்பும் அன்பில் வணங்குதற்குச் சார வெழுந்த குறிப்பாலுந் தாமும் உடனே செலத்துணிந்தார்.	82
இருவர் திருவுள் ளமும்இசைந்த பொழுதில் எழுந்து திருவாரூர் ஒருவர் மலர்த்தாள் புக்கிறைஞ்சி யுடன்பாட் டருளாற் போந்தருளி மருவும் உரிமைப் பெருஞ் சுற்றம் வரம்பில் பணிகள் வாகனங்கள் பொருவில் பண்டா ரங்கொண்டு போது வார்கள் உடன்போத.	83
சேவித் தணையும் பரிசனங்கள் சூழத் திருவா ரூர்இறைஞ்சிக் காவிற் பயிலும் புறம்பணையைக் கடந்து போந்து கீழ்வேளூர் மேவிப் பரமர் கழல்வணங்கிப் போந்து வேலைக் கழிக்கானல் பூவில் திகழும் பொழில்நாகை புகுந்து காரோ ணம்பணிந்தார்.	84
திருக்கா ரோணச் சிவக்கொழுந்தைச் சென்று பணிந்து சிந்தையினை உருக்கார் வச்செந் தமிழ்மாலை சாத்திச் சிலநாள் உறைந்துபோய்ப் பெருக்கா றுலவு சடைமுடியார் இடங்கள் பலவும் பணிந்தேத்தி அருட்கா ரணர்தந் திருமறைக்கா டணைந்தார் சேர ராரூரர்.	85
Go to top
முந்நீர் வலங்கொன் மறைக்காட்டு முதல்வர் கோயில் சென்றெய்திச் செந்நீர் வாய்மைத் திருநாவுக் கரசும் புகலிச் சிவக்கன்றும் அந்நேர் திறக்க அடைக்கவெனப் பாடுந் திருவா யிலையணைந்து நன்னீர் பொழியும் விழியினராய் நாயன் மாரை நினைந்திறைஞ்சி.	86
நிறைந்த மறைகள் அர்ச்சித்த நீடு மறைக்காட் டருமணியை இறைஞ்சி வீழ்ந்து பணிந்தெழுந்து போற்றி யாழைப் பழித்தென்னும் அறைந்த பதிகத் தமிழ்மாலை நம்பி சாத்த அருட்சேரர் சிறந்த அந்தா தியிற்சிறப்பித் தனவே யோதித் திளைத்தெழுந்தார்.	87
எழுந்து பணிந்து புறத்தெய்தி இருவர் பெருந்தொண் டருஞ்சிலநாள் செழுந்தண் பழனப் பதியதனுள் அமர்ந்து தென்பால் திரைக்கடனஞ் சழுந்து மிடற்றார் அகத்தியான் பள்ளி யிறைஞ்சி அவிர்மதியக் கொழுந்து வளர்செஞ் சடைக்குழகர் கோடிக் கோயில் குறுகினார்.	88
கோடிக் குழகர் கோயில்அயல் குடிக ளொன்றும் புறத்தெங்கும் நாடிக் காணா துள்புக்கு நம்பர் பாதந் தொழுதுள்ளம் வாடிக் கடிதாய்க் கடற்காற்றென்று எடுத்து மலர்க்கண் ணீர்வாரப் பாடிக் காடு காள்புணர்ந்த பரிசும் பதிகத் திடைவைத்தார்.	89
அங்கு வைகிப் பணிந்தருளால் போவார் அகன்சோ ணாட்டரனார் தங்குமிடங்கள் வணங்கிப் போய்ப் பாண்டி நாடு தனைச்சார்ந்து திங்கண் முடியார் திருப்புத்தூர் இறைஞ்சிப் போந்து சேண்விளங்கு மங்குல் தவழும் மணிமாட மதுரை மூதூர் வந்தணைந்தார்.	90
Go to top
சேரமான் தோழரும்அச் சேரர்பிரா னும்பணிப்பூண் ஆரமார் பரைமதுரை ஆலவா யினில்வணங்க வாரமா வந்தணைய வழுதியார் மனக்காதல் கூரமா நகர்கோடித் தெதிர்கொண்டு கொடுபுக்கார்.	91
தென்னவர்கோன் மகளாரைத் திருவேட்டு முன்னரே தொன்மதுரை நகரின்கண் இனிதிருந்த சோழனார் அன்னவர்க ளுடன்கூட அணையஅவ ருங்கூடி மன்னுதிரு வாலவாய் மணிக்கோயில் வந்தணைந்தார்.	92
திருவால வாய்அமர்ந்த செஞ்சடையார் கோயில்வலம் வருவார்முன் வீழ்ந்திறைஞ்சி வன்றொண்டர் வழித்தொண்டு தருவாரைப் போற்றிசைத்துத் தாழ்ந்தெழுந்து வாழ்ந்ததமிழ்ப் பெருவாய்மை மலர்புனைந்து பெருமகிழ்ச்சி பிறங்கினார்.	93
படியேறு புகழ்ச்சேரர் பெருமானும் பார்மிசைவீழ்ந் தடியேனைப் பொருளாக அளித்ததிரு முகக்கருணை முடிவுஏதென் றறிந்திலேன் எனமொழிகள் தடுமாறக் கடியேறு கொன்றையார் முன்பரவிக் களிகூர்ந்தார்.	94
செம்பியனா ருடன்செழியர் தாம்பணிந்து சேரருடன் நம்பியும்முன் புறத்தணைய நண்ணியபே ருவகையால் உம்பர்பிரான் கோயிலினின் றுடன்கொடுபோ யிருவர்க்கும் பைம்பொன்மணி மாளிகையிற் குறைவறுத்தார் பஞ்சவனார்.	95
Go to top
உளம்மகிழக் கும்பிட்டங் குறையுநாள் உதியருடன் கிளரொளிப்பூண் வன்றொண்டர் தாமிருந்த இடங்கெழுமி வளவனார் மீனவனார் வளம்பெருக மற்றவரோ டளவளா வியவிருப்பால் அமர்ந்துகலந் தினிதிருந்தார்.	96
அந்நாளில் மதுரைநகர் மருங்கரனார் அமர்பதிகள் பொன்னாரம் மணிமார்பிற் புரவலர்மூ வரும்போதச் செந்நாவின் முனைப்பாடித் திருநாடர் சென்றிறைஞ்சிச் சொன்மாலை களுஞ்சாத்தித் தொழத்திருப்பூ வணத்தணைவார்.	97
நீடுதிருப் பூவணத்துக் கணித்தாக நேர்செல்ல மாடுவருந் திருத்தொண்டர் மன்னியஅப் பதிகாட்டத் தேடுமறைக் கரியாரைத் திருவுடையார் என்றெடுத்துப் பாடிசையிற் பூவணமீ தோவென்று பணிந்தணைவார்.	98
சென்றுதிருப் பூவணத்துத் தேவர்பிரான் மகிழ்கோயில் முன்றில்வலங் கொண்டிறைவர் முன்வீழ்ந்து பணிந்தெழுந்து நின்றுபர விப்பாடி	99
அப்பதியில் அமர்ந்திறைஞ்சிச் சிலநாளில் ஆரூரர் முப்பெருவேந் தர்களோடு முதன்மதுரை நகரெய்தி மெய்ப்பரிவில் திருவால வாயுடையார் விரைமலர்த்தாள் எப்பொழுதும் பணிந்தேத்தி இன்புற்றங் கமர்கின்றார்.	100
Go to top
செஞ்சடையார் திருவாப்ப னூர்திருவே டகம்முதலாம் நஞ்சணியுங் கண்டரவர் நயந்தபதி நண்ணியே எஞ்சலிலாக் காதலினால் இனிதிறைஞ்சி மீண்டணைந்து மஞ்சணையும் மதில்மதுரை மாநகரின் மகிழ்ந்திருந்தார்.	101
பரமர்திருப் பரங்குன்றில் சென்றுபார்த் திபரோடும் புரமெரித்தார் கோயில்வலங் கொண்டுபுகுந் துள்ளிறைஞ்சிச் சிரமலிமா லைச்சடையார் திருவடிக்கீழ் ஆட்செய்யும் அருமைநினைந் தஞ்சுதும்என் றாரூரர் பாடுவார்.	102
கோத்திட்டை எனஎடுத்துக் கோதில்திருப் பதிகவிசை மூர்த்தியார் தமைவணங்கி முக்கோக்கள் தம்முன்பே ஏத்தியவண் டமிழ்மாலை இன்னிசைபா டிப்பரவிச் சாத்தினார் சங்கரனார் தங்குதிருப் பரங்குன்றில்.	103
இறைவர்திருத் தொண்டுபுரி யருமையினை இருநிலத்து முறைபுரியும் முதல்வேந்தர் மூவர்களும் கேட்டஞ்சி மறைமுந்நூல் மணிமார்பின் வன்றொண்டர் தமைப்பணிந்தார் நிறைதவத்தோர் அப்பாலும் நிருத்தர்பதி தொழநினைந்தார்.	104
அந்நாட்டுத் திருப்பதிகள் பலவும்அணைந்து இறைஞ்சமலை நன்னாட்டு வேந்தருடன் நம்பிதாம் எழுந்தருள மின்னாட்டும் பன்மணிப்பூண் வேந்தர்இரு வருமீள்வார் தென்னாட்டு வேண்டுவன செய்தமைப்பார் தமைவிடுத்தார்.	105
Go to top
இருபெருவேந் தரும்இயல்பின் மீண்டதற்பின் எழுந்தருளும் பொருவருஞ்சீர் வன்றொண்டர் புகழ்ச்சேர ருடன்புனிதர் மருவியதா னம்பலவும் பணிந்துபோய் மலைச்சாரல் குருமணிகள் வெயிலெறிக்கும் குற்றாலஞ் சென்றடைந்தார்.	106
குற்றாலத் தினிதமர்ந்த கூத்தர்குரை கழல்வணங்கிச் சொல்தாம மலர்புனைந்து குறும்பலாத் தொழுதிப்பால் முற்றாவெண் மதிமுடியார் பதிபணிந்து மூவெயில்கள் செற்றார்மன் னியசெல்வத் திருநெல்வே லியையணைந்தார்.	107
நெல்வேலி நீற்றழகர் தமைப்பணிந்து பாடிநிகழ் பல்வேறு பதிபிறவும் பணிந்தன்பால் வந்தணைந்தார் வில்வேட ராய்வென்றி விசயன்எதிர் பன்றிப்பின் செல்வேத முதல்வரமர் திருவிரா மேச்சரத்து.	108
மன்னும்இரா மேச்சரத்து மாமணியை முன்வணங்கிப் பன்னுதமிழ்த் தொடைசாத்திப் பயில்கின்றார் பாம்பணிந்த சென்னியர்மா தோட்டத்துத் திருக்கேதீச் சரஞ்சார்ந்து சொன்மலர்மா லைகள்சாத்தித் தூரத்தே தொழுதமர்ந்தார்.	109
திருஇரா மேச்சரத்துச் செழும்பவளச் சுடர்க்கொழுந்தைப் பரிவினால் தொழுதகன்று பரமர்பதி பிறபணிந்து பெருவிமா னத்திமையோர் வணங்குபெருந் திருச்சுழியல் மருவினார் வன்றொண்டர் மலைவேந்த ருடன்கூட.	110
Go to top
திருச்சுழியல் இடங்கொண்ட செம்பொன்மலைச் சிலையாரைக் கருச்சுழியின் வீழாமைக்	111
அங்கணரைப் பணிந்துறையும் ஆரூரர்க் கவ்வூரில் கங்குலிடைக் கனவின்கண் காளையாந் திருவடிவால் செங்கையினிற் பொற்செண்டுந் திருமுடியிற் சுழியமுடன் எங்குமிலாத் திருவேடம் என்புருக முன்காட்டி.	112
கானப்பேர் யாம்இருப்ப தெனக்கழறிக் கங்கையெனும் வானப்பே ராறுலவும் மாமுடியார் தாம்அகல ஞானப்பே ராளர்உணர்ந் ததிசயித்து நாகமுடன் ஏனப்பே ரெயிறணிந்தார் அருளிருந்த பரிசென்பார்.	113
கண்டருளும் படிகழறிற்	114
காளையார் தமைக்கண்டு தொழப்பெறுவ தென்றென்று தாளைநா ளும்பரவத் தருவார்பாற் சார்கின்றார் ஆளைநீ ளிடைக்காண வஞ்சியநீர் நாயயலே வாளைபாய் நுழைப்பழன முனைப்பாடி வளநாடர்.	115
Go to top
மன்னுதிருக் கானப்பேர் வளம்பதியில் வந்தெய்திச் சென்னிவளர் மதியணிந்தார் செழுங்கோயில் வலங்கொண்டு முன்னிறைஞ்சி யுள்ளணைந்து முதல்வர்சே வடிதாழ்ந்து பன்னுசெழுந் தமிழ்மாலை பாடினார் பரவினார்.	116
ஆராத காதலுட னப்பதியிற் பணிந்தேத்திச் சீராருந் திருத்தொண்டர் சிலநாளங் கமர்ந்தருளிக் காராரு மலர்ச்சோலைக் கானப்பேர் கடந்தணைந்தார் போரானேற் றார்கயிலைப் பொருப்பர்திருப் புனவாயில்.	117
புனவாயிற் பதியமர்ந்த புனிதரா லயம்புக்கு மனவார்வம் உறச்சித்த நீநினைஎன் னொடுஎன்று வினவான தமிழ்பாடி வீழ்ந்திறைஞ்சி யப்பதியில் சினவானை யுரித்தணிந்தார் திருப்பாதந் தொழுதிருந்தார்.	118
திருப்புனவா யிற்பதியில் அமர்ந்தசிவ னார்மகிழும் விருப்புடைய கோயில்பல பணிந்தருளால் மேவினார் பொருப்பினொடு கான்அகன்று புனற்பொன்னி நாடணைந்து பருப்பதவார் சிலையார்தம் பாம்பணிமா நகர்தன்னில்.	119
பாதாளீச் சரமிறைஞ்சி அதன்மருங்கு பலபதியும் வேதாதி நாதர்கழல் வணங்கிமிகு விரைவினுடன் சூதாருந் துணைமுலையார் மணிவாய்க்குத் தோற்றிரவு சேதாம்பல் வாய்திறக்குந் திருவாரூர் சென்றணைந்தார்.	120
Go to top
திருநாவ லூர்வேந்தர்	121
வாசமலர்க் கொன்றையார் மகிழ்கோயில் வலங்கொண்டு நேசமுற முன்னிறைஞ்சி நெடும்பொழுதெ லாம்பரவி ஏசறவால் திருப்பதிகம் எடுத்தேத்தி எழுந்தருளால் பாசவினைத் தொடக்கறுப்பார் பயில்கோயில் பணிந்தணைவார்.	122
பரவையார் மாளிகையில் பரிசனங்கள் முன்னெய்த விரவுபே ரலங்கார விழுச்செல்வம் மிகப்பெருக வரவெதிர்கொண் டடிவணங்க வன்றொண்டர் மலைநாட்டுப் புரவலனா ரையுங்கொண்டு பொன்னணிமா ளிகைபுகுந்தார்.	123
பரவியே பரவையார் பரிவுடனே பணிந்தேத்தி விரவியபோ னகங்கறிகள் விதம்பலவா கச்சமைத்துப் பரிகலமும் பாவாடை பகல்விளக்கும் உடனமைத்துத் திருவமுது செய்வித்தார் திருந்தியதேன் மொழியினார்.	124
மங்கலமாம் பூசனைகள் பரவையார் செயமகிழ்ந்து தங்கியினி தமர்கின்றார் தம்பிரான் கோயிலினுள் பொங்குபெருங் காலமெலாம் புக்கிறைஞ்சிப் புறத்தணைந்து நங்கள்பிரா னருள்மறவா நல்விளையாட் டினைநயந்தார்.	125
Go to top
நிலைச்செண்டும் பரிச்செண்டும் வீசிமிக மகிழ்வெய்தி விலக்கரும்போர்த் தகர்ப்பாய்ச்சல் கண்டருளி வென்றிபெற மலைக்கு நெடு முட்கணைக்கால் வாரணப்போர் மகிழ்ந்தருளி அலைக்குமறப் பலபுள்ளின் அமர்விரும்பி யமர்கின்றார்.	126
விரவு காதல் மீக்கூர மேவு நாள்கள் பலசெல்லக் கரவில் ஈகைக் கேரளனார் தங்கள் கடல்சூழ் மலைநாட்டுப் பரவை யார்தங் கொழுநனார் தம்மைப் பனிந்து கொண்டணைவான் இரவும் பகலுந் தொழுதிரக்க இசைந்தார் அவரும் எழுந்தருள.	127
நங்கை பரவை யார்உள்ளத் திசைவால் நம்பி யெழுந்தருளத் திங்கள் முடியார் திருவருளைப் பரவிச் சேர மான்பெருமாள் எங்கும் உள்ள அடியாருக் கேற்ற பூசை செய்தருளிப் பொங்கு முயற்சி இருவரும்போய்ப் புக்கார் புனிதர் பூங்கோயில்.	128
தம்பி ரானைத் தொழுதருளால் போந்து தொண்டர் சார்ந்தணைய நம்பி யாரூ ரருஞ்சேரர் நன்னாட் டரச னாராகும் பைம்பொன் மணிநீண் முடிக்கழறிற் றறிவார் தாமும் பயணமுடன் செம்பொன் நீடு மதிலாரூர் தொழுது மேல்பாற் செல்கின்றார்.	129
பொன்பரப்பி மணிவரன்றிப் புனல்பரக்குங் காவேரித் தென்கரைபோய்ச் சிவன்மகிழ்ந்த கோயில்பல சென்றிறைஞ்சி மின்பரப்புஞ் சடையண்ணல் விரும்புதிருக் கண்டியூர் அன்புருக்குஞ் சிந்தையுடன் பணிந்துபுறத் தணைந்தார்கள்.	130
Go to top
வடகரையில் திருவையா றெதிர்தோன்ற மலர்க்கரங்கள் உடலுருக வுள்ளுருக வுச்சியின்மேற் குவித்தருளிக் கடல்பரந்த தெனப்பெருகுங் காவிரியைக் கடந்தேறித் தொடர்வுடைய திருவடியைத் தொழுவதற்கு நினைவுற்றார்.	131
ஐயா றதனைக் கண்டுதொழு தருளா ரூரர் தமைநோக்கிச் செய்யாள் பிரியாச் சேரமான் பெருமாள் அருளிச் செய்கின்றார் மையார் கண்டர் மருவுதிரு வையா றிறைஞ்ச மனமுருகி நையா நின்ற திவ்வாறு கடந்து பணிவோம் நாமென்ன.	132
ஆறு பெருகி இருகரையும் பொருது விசும்பில் எழுவதுபோல் வேறு நாவாய் ஓடங்கள் மீது செல்லா வகைமிகைப்ப நீறு விளங்குந் திருமேனி நிருத்தர் பாதம் பணிந்தன்பின் ஆறு நெறியாச் செலவுரியார் தரியா தழைத்துப் பாடுவார்.	133
பரவும் பரிசொன் றெடுத்தருளிப் பாடுந் திருப்பாட் டின்முடிவில் அரவம் புனைவார் தமைஐயா றுடைய வடிக ளோவென்று விரவும் வேட்கை யுடனழைத்து விளங்கும் பெருமைத் திருப்பதிகம் நிரவு மிசையில் வன்றொண்டர் நின்று தொழுது பாடுதலும்.	134
மன்றில் நிறைந்து நடமாட வல்லார் தொல்லை ஐயாற்றில் கன்று தடையுண் டெதிரழைக்கக் கதறிக் கனைக்கும் புனிற்றாப்போல் ஒன்று முணர்வால் சராசரங்கள் எல்லாங் கேட்க வோலமென நின்று மொழிந்தார் பொன்னிமா நதியு நீங்கி நெறிகாட்ட.	135
Go to top
விண்ணின் முட்டும் பெருக்காறு மேல்பாற் பளிக்கு வெற்பென்ன நண்ணி நிற்கக் கீழ்பால்நீர் வடிந்த நடுவு நல்லவழி பண்ணிக் குளிர்ந்த மணற்பரப்பக் கண்ட தொண்டர் பயில்மாரி கண்ணிற் பொழிந்து மயிர்ப்புளகங் கலக்கக் கைஅஞ் சலிகுவித்தார்.	136
நம்பி பாதஞ் சேரமான் பெருமாள் பணிய நாவலூர்ச் செம்பொன் முந்நூன் மணிமார்பர் சேரர் பெருமான் எதிர்வணங்கி உம்பர் நாதர் உமக்களித்த தன்றோ என்ன வுடன்மகிழ்ந்து தம்பி ரானைப் போற்றிசைத்துத் தடங்கா வேரி நடுவணைந்தார்.	137
செஞ்சொல் தமிழ்நா வலர்கோனும் சேரர் பிரானும் தம்பெருமான் எஞ்ச லில்லா நிறைஆற்றின் இடையே யளித்த மணல்வழியில் தஞ்ச முடைய பரிசனமும் தாமும் ஏறித் தலைச்சென்று பஞ்ச நதிவா ணரைப்பணிந்து விழுந்தார் எழுந்தார் பரவினார்.	138
அங்கண் அரனார் கருணையினை ஆற்றா தாற்றித் திளைத்திறைஞ்சித் தங்கள் பெருமான் திருவருளால் தாழ்ந்து மீண்டுந் தடம்பொன்னிப் பொங்கு நதியின் முன்வந்த படியே நடுவு போந்தேறத் துங்க வரைபோல் நின்றநீர் துரந்து தொடரப் பெருகியதால்.	139
ஆய செயலின் அதிசயத்தைக் கண்டக் கரையில் ஐயாறு மேய பெருமான் அருள்போற்றி வீழ்ந்து தாழ்ந்து மேல்பாற்போய்த் தூய மதிவாழ்சடையார்தம் பதிகள் பிறவுந் தொழுதேத்திச் சேய கொங்கர் நாடணைந்தார் திருவா ரூரர் சேரருடன்.	140
Go to top
கொங்கு நாடு கடந்துபோய்க் குலவு மலைநாட் டெல்லையுற நங்கள் பெருமான் தோழனார் நம்பி தம்பி ரான்தோழர் அங்க ணுடனே யணையவெழுந்து அருளா நின்றார் எனும்விருப்பால் எங்கும் அந்நாட் டுள்ளவர்கள் எல்லாம் எதிர்கொண் டின்புறுவார்.	141
பதிகள் எங்குந் தோரணங்கள் பாங்கர் எங்கும் பூவனங்கள் வதிகள் எங்குங் குளிர்பந்தர் மனைகள் எங்கும் அகிற்புகைக்கார் நதிகள் எங்கும் மலர்ப்பிறங்கல் ஞாங்கர் எங்கும் ஓங்குவன நிதிகள் எங்கும் முழவினொலி நிலங்கள் எங்கும் பொலஞ்சுடர்ப்பூ.	142
திசைகள் தோறும் வரும்பெருமை அமைச்சர் சேனைப் பெருவெள்ளம் குசைகொள் வாசி நிரைவெள்ளங் கும்ப யானை யணிவெள்ளம் மிசைகொள் பண்ணும் பிடிவெள்ளம் மேவுஞ் சோற்று வெள்ளங்கண் டசைவி லின்பப் பெருவெள்ளத் தமர்ந்து கொடுங்கோ ளூர்அணைந்தார்.	143
கொடுங்கோ ளூரின் மதில்வாயில் அணிகோ டித்து மறுகில்உடுத் தொடுங்கோ புரங்கள் மாளிகைகள் சூளி குளிர்சா லைகள்தெற்றி நெடுங்கோ நகர்கள் ஆடரங்கு நிரந்த மணித்தா மங்கமுகு விடுங்கோ தைப்பூந் தாமங்கள் நிரைத்து வெவ்வே றலங்கரித்து.	144
நகர மாந்தர் எதிர்கொள்ள நண்ணி எண்ணில் அரங்குதொறும் மகரக் குழைமா தர்கள்பாடி ஆட மணிவீ தியிலணைவார் சிகர நெடுமா ளிகையணையார் சென்று திருவஞ் சைக்களத்து நிகரில் தொண்டர் தமைக்கொண்டு புகுந்தார் உதியர் நெடுந்தகையார்.	145
Go to top
இறைவர் கோயில் மணிமுன்றில் வலங்கொண் டிறைஞ்சி எதிர்புக்கு நிறையுங் காத லுடன்வீழ்ந்து பணிந்து நேர்நின் றாரூரர் முறையில் விளம்புந் திருப்பதிகம் முடிப்பது கங்கை யென்றெடுத்தப் பிறைகொள் முடியார் தமைப்பாடிப் பரவிப் பெருமா ளுடன்தொழுதார்.	146
தொழுது திளைத்துப் புறம்போந்து தோன்றப் பண்ணும் பிடிமேல்பார் முழுதும் ஏத்த நம்பியைமுன் பேற்றிப் பின்பு தாம்ஏறிப் பழுதின் மணிச்சா மரைவீசிப் பைம்பொன் மணிமா ளிகையில்வரும் பொழுது மறுகில் இருபுடையும் மிடைந்தார் வாழ்த்திப் புகல்கின்றார்.	147
நல்ல தோழர் நம்பெருமாள் தமக்கு நம்பி இவரென்பார் எல்லை யில்லாத் தவம்முன்பென் செய்தோம் இவரைத் தொழவென்பார் செல்வம் இனியென் பெறுவது நம் சிலம்பு நாட்டுக் கெனவுரைப்பார் சொல்லுந் தரமோ பெருமாள்செய் தொழிலைப் பாரீ ர் எனத்தொழுவார்.	148
பூவும் பொரியும் பொற்றுகளும் பொழிந்து பணிவார் பொருவில்இவர் மேவும் பொன்னித் திருநாடே புவிக்குத் திலதம் எனவியப்பார் பாவுந் துதிகள் எம்மருங்கும் பயில வந்து மாளிகையின் மாவுங் களிறும் நெருங்குமணி வாயில் புகுந்து மருங்கிழிந்தார்.	149
கழறிற் றறியுந் திருவடியும் கலைநா வலர்தம் பெருமானாம் முழவிற் பொலியுந் திருநெடுந்தோள் முனைவர் தம்மை யுடன்கொண்டு விழவிற் பொலியும் மாளிகையில் விளங்கு சிங்கா சனத்தின்மிசை நிழல்திக் கொளிரும் பூணாரை இருத்தித் தாமும் நேர்நின்று.	150
Go to top
செம்பொற் கரக வாசநீர் தேவி மார்கள் எடுத்தேந்த அம்பொற் பாதந் தாம்விளக்கி யருளப் புகலும் ஆரூரர் தம்பொன் தாளை வாங்கியிது தகாதென் றருளத் தரணியில்வீழ்ந் தெம்பெற் றிமையாற் செய்தனஈங் கெல்லாம் இசைய வேண்டுமென.	151
பெருமாள் வேண்ட எதிர்மறுக்க மாட்டார் அன்பின் பெருந்தகையார் திருமா நெடுந்தோள் உதியர்பிரான் செய்த வெல்லாங் கண்டிருந்தார் அருமா னங்கொள் பூசனைகள் அடைவே எல்லாம் அளித்ததற்பின் ஒருமா மதிவெண் குடைவேந்த ருடனே அமுது செய்துவந்தார்.	152
சேர ருடனே திருவமுது செய்த பின்பு கைகோட்டி ஆரம் நறுமென் கலவைமான் மதச்சாந் தாடை யணிமணிப்பூண் ஈர விரைமென் மலர்ப்பணிகள் இனைய முதலா யினவருக்கம் சார வெடுத்து வன்தொண்டர்ச் சாத்தி மிக்க தமக்காக்கி.	153
பாடல் ஆட ல் இன்னியங்கள் பயிறன் முதலாம் பண்ணையினில் நீடும் இனிய விநோதங்கள் நெருங்கு காலந் தொறும்நிகழ மாடு விரைப்பூந் தருமணஞ்செய் ஆரா மங்கள் வைகுவித்ததுக் கூட முனைப்பா டியர்கோவைக் கொண்டு மகிழ்ந்தார் கோதையார்.	154
செண்டாடும் தொழின்மகிழ்வும் சிறுசோற்றுப் பெருஞ்சிறப்பும் வண்டாடும் மலர்வாவி மருவியநீர் விளையாட்டும் தண்டாமும் மதகும்பத் தடமலைப்போர் சலமற்போர் கண்டாரா விருப்பெய்தக் காவலனார் காதல்செய்நாள்.	155
Go to top
நாவலர்தம் பெருமானும் திருவாரூர் நகராளும் தேவர்பிரான் கழல்ஒருநாள் மிகநினைந்த சிந்தையராய் ஆவியைஆ ரூரானை மறக்கலுமா மேஎன்னும் மேவியசொல் திருப்பதிகம் பாடியே வெருவுற்றார்.	156
திருவாரூர் தனைநினைந்து சென்றுதொழு வேன்என்று மருவுஆர்வத் தொண்டருடன் வழிக்கொண்டு செல்பொழுதில் ஒருவாநண் புள்ளுருக வுடனெழுந்து கைதொழுது பெருவான வரம்பனார் பிரிவாற்றார் பின்செல்வார்.	157
வன்றொண்டர் முன்எய்தி மனமழிந்த வுணர்வினராய் இன்றுமது பிரிவாற்றேன் என்செய்கேன் யான்என்ன ஒன்றும்நீர் வருந்தாதே யுமதுபதி யின்கணிருந் தன்றினார் முனைமுருக்கி அரசாளும் எனமொழிந்தார்.	158
ஆரூரர் மொழிந்தருள அதுகேட்ட அருட்சேரர் பாரோடு விசும்பாட்சி எனக்குமது பாதமலர் தேரூரும் நெடுவீதித் திருவாரூர்க் கெழுந்தருள நேரூரு மனக்காதல் நீக்கவும்அஞ் சுவன்என்றார்.	159
மன்னவனார் அதுமொழிய வன்றொண்டர் எதிர்மொழிவார் என்னுயிருக் கின்னுயிராம் எழிலாரூர்ப் பெருமானை வன்னெஞ்சக் கள்வனேன் மறந்திரேன் மதியணிந்தார் இன்னருளால் அரசளிப்பீர் நீரிருப்பீர் எனவிறைஞ்ச.	160
Go to top
மற்றவரும் பணிந்திசைந்தே மந்திரிகள் தமையழைத்துப் பொற்புநிறை தொன்னகரில் இற்றைக்கு முன்புகுந்த நற்பெரும்பண் டாரநா னாவருக்க மானவெலாம் பற்பலவாம் ஆளின்மிசை ஏற்றிவரப் பண்ணும்என.	161
ஆங்கவரும் அன்றுவரை ஆயமா கியதனங்கள் ஓங்கியபொன் நவமணிகள் ஒளிர்மணிப்பூண் துகில்வருக்கம் ஞாங்கர்நிறை விரையுறுப்பு வருக்கமுதல் நலஞ்சிறப்பத் தாங்குபொதி வினைஞர்மேல் தலம்மலியக் கொண்டணைந்தார்.	162
மற்றவற்றின் பரப்பெல்லாம் வன்றொண்டர் பரிசனத்தின் முற்படவே செலவிட்டு முனைப்பாடித் திருநாடர் பொற்பதங்கள் பணிந்தவரைத் தொழுதெடுத்துப் புனையலங்கல் வெற்பியர்தோ ளுறத்தழுவி விடையளித்தார் வன்றொண்டர்.	163
ஆரூரர் அவர்தமக்கு விடையருளி அங்ககன்று காரூரும் மலைநாடு கடந்தருளிக் கற்சுரமும் நீரூருங் கான்யாறு நெடுங்கானும் பலகழியச் சீரூருந் திருமுருகன் பூண்டிவழிச் செல்கின்றார்.	164
திருமுருகன் பூண்டிஅயல் செல்கின்ற போழ்தின்கண் பொருவிடையார் நம்பிக்குத் தாமேபொன் கொடுப்பதலால் ஒருவர்கொடுப் பக்கொள்ள ஒண்ணாமைக் கதுவாங்கி பெருகருளால் தாங்கொடுக்கப் பெறுவதற்கோ அதுஅறியோம்.	165
Go to top
வென்றிமிகு பூதங்கள் வேடர்வடி வாய்ச்சென்று வன்றொண்டர் பண்டாரங் கவரஅருள் வைத்தருள அன்றினார் புரமெரித்தார் அருளால்வேட் டுவப்படையாய்ச் சென்றவர்தாம் வரும்வழியில் இருபாலும் செயிர்த்தெழுந்து.	166
வில்வாங்கி அலகம்பு விசைநாணில் சந்தித்துக் கொல்வோம்இங் கிட்டுப்போம் எனக்கோபத் தாற்குத்தி எல்லையில்பண் டாரமெலாங் கவர்ந்துகொள இரிந்தோடி அல்லலுடன் பறியுண்டார் ஆரூரர் மருங்கணைந்தார்.	167
ஆரூரர் தம்பால்அவ் வேடுவர்சென் றணையாதே நீரூருஞ் செஞ்சடையார் அருளினால் நீங்கஅவர் சேர்ஊராந் திருமுருகன் பூண்டியினிற் சென்றெய்திப் போரூரும் மழவிடையார் கோயிலைநா டிப்புக்கார்.	168
அங்கணர்தங் கோயிலினை அஞ்சலிகூப் பித்தொழுது மங்குலுற நீண்டதிரு வாயிலினை வந்திறைஞ்சிப் பொங்குவிருப் புடன்புக்கு வலங்கொண்டு புனிதநதி திங்கள்முடிக் கணிந்தவர்தந் திருமுன்பு சென்றணைந்தார்.	169
உருகியஅன் பொடுகைகள் குவித்துவிழுந் துமைபாகம் மருவியதம் பெருமான்முன் வன்றொண்டர் பாடினார் வெருவுறவே டுவர்பறிக்கும் வெஞ்சுரத்தில் எத்துக்கிங் கருகிருந்தீர் எனக்கொடுகு வெஞ்சிலையஞ் சொற்பதிகம்.	170
Go to top
பாடியவர் பரவுதலும் பரம்பொருளாம் அவரருளால் வேடுவர் தாம் பறித்தபொரு ளவையெல்லாம் விண்ணெருங்க நீடுதிரு வாயிலின்முன் குவித்திடலும் நேரிறைஞ்சி ஆடுமவர் திருவருளால் அப்படியே கைக்கொண்டார்.	171
கைக்கொண்டு கொடுபோம்அக் கைவினைஞர் தமையேவி மைக்கொண்ட மிடற்றாரை வணங்கிப்போய்க் கொங்ககன்று மெய்க்கொண்ட காதலினால் விரைந்தேகி மென்கரும்பும் செய்க்கொண்ட சாலியுஞ்சூழ் திருவாரூர் சென்றணைந்தார்.	172
நாவலர்மன் னவர்அருளால் விடைகொண்ட நரபதியார் ஆவியின்ஒன் றாநண்பின் ஆரூரர் தமைநினைந்து மாவலரு மலர்ச்சோலை மகோதையினின் மன்னிமலைப் பூவலயம் பொதுநீக்கி அரசுரிமை புரிந்திருந்தார்.	173
இந்நிலைமை யுதியர்பிரான் எம்பிரான் வன்றொண்டர் பொன்னிவள நாடகன்று மகோதையினின் மேற்புகுந்து மன்னுதிருக் கயிலையினின் மதவரைமேல் எழுந்தருள முன்னர்வயப் பரியுகைக்குந் திருத்தொழில்பின் மொழிகின்றாம்.	174
மலைமலிந்த திருநாட்டு மன்னவனார் மாகடல்போல் சிலைமலிந்த கொடித்தானைச் சேரலனார் கழல்போற்றி நிலைமலிந்த மணிமாட நீண்மறுகு நான்மறைசூழ் கலைமலிந்த புகழ்க்காழிக் கணநாதர் திறமுரைப்பாம்.	175
Go to top

Thevaaram Link  - Shaivam Link
Other song(s) from this location:      
send corrections and suggestions to admin-at-sivaya.org
This page was last modified on Tue, 30 Dec 2025 15:21:40 +0000